ٹوکیو: جاپان میں ایک دلچسپ واقعہ پیش آیا، ایک پالتو مچھلی نے کمپیوٹر کی غلطی سے نہ صرف اپنے مالک کی رقم خرچ کر ڈالی بلکہ اس کے کریڈٹ کارڈ کی جملہ تفصیلات بھی یوٹیوب کی براہِ راست نشریات میں ظاہر کر دیں۔
جاپانی یوٹیوبر میوٹی کائمارو المعروف موریس یوٹیوب پر ایک چینل چلاتے ہیں جس میں مچھلیوں کو ویڈیو گیم کھیلنا سکھایا جاتا ہے، وہ بالخصوص پوکے مون گیمز میں دلچسپی رکھتے ہیں۔
بیٹا قسم کی یہ مچھلی اپنی ذہانت کی وجہ سے جانی جاتی ہیں، ماضی میں بھی یہ مچھلی جاپانی یوٹیوبر کی ویڈیوز میں مختلف گیمز میں مہارت کے باعث دنیا بھر میں توجہ کا مرکز بنی تھی۔
ایک لائیو اسٹریم سیشن کے دروان ایک خامی کے باعث گیم ہوم اسکرین پر واپس آجاتی ہے، اس موقع پر مچھلیوں کے پاس گیمنگ کنسول کا کنٹرول موجود تھا مچھلیاں کئی گھنٹوں تک وہ یوزر نیم بدلنے، نئے اواتار ڈاؤن لوڈ کرنے، ای میل بھیجنے، شرائط و ضوابط پڑھنے اور پیمنٹ اکاؤنٹ بنانے میں مصروف رہیں۔
THE FISH JUST WON WITH WALREIN AS THEIR LAST POKEMON AND SPAMMED ICEBALL. A FISH BEAT POKEMON. FOUR FISH BEAT POKEMON JUST NOW. https://t.co/LFs4kjtoSL
— ZACK @ MUSIC COMMISSIONS OPEN!!! (@Skeletondoggy) November 6, 2020
اس دوران مچھلی کی حرکت سے ننٹینڈو کی ای شاپ کھل گئی اور مچھلی نے مالک کے چار ڈالر کی خریداری پوائنٹس کی صورت میں کر ڈالی۔ اس کے علاوہ لائیو اسٹریم پر مچھلی کی ایک حرکت سے مالک کے کریڈٹ کارڈ کی تفصیلات بھی نمایاں ہوگئیں۔
واضح رہے کہ لائیو اسٹریم کے دوران ان کی پالتو مچھلیاں پانی کے ٹینک میں خاص انداز میں تیرتی ہیں، فش ٹینک میں مالک نے حرکت نوٹ کرنے والا جدید سافٹ ویئر انسٹال کیا تھا، جس کی وجہ سے مچھلیاں سوئچ کنسول کو دور سے کنٹرول کرنے کے قابل ہوئیں۔
ویڈیو پر ایک کیپشن میں مذاق کرتے ہوئے کہا گیا کہ یہ دنیا کی پہلی ویڈیو ہے جس میں پالتو مچھلیاں اپنے مالک کے کریڈٹ کارڈ سے خریداری کررہی ہیں۔