بلوچستان ہائیکورٹ میں تحریک انصاف کے سینیٹر اعظم سواتی پر درج مقدمات ختم کرانے کے لیے درخواست جمع کروا دی گئی۔
صدر پی ٹی آئی بلوچستان قاسم سوری نے میڈیا سے گفتگو کرتے ہوئے کہا کہ اعظم سواتی کے خلاف 5 مقدمات ختم کرنے کیلئےدرخواست جمع کروائی ہے حیرت ہے سپریم کورٹ کے حکم کے باوجود بھی 50 سے زاہد مقدمات درج کئے گئے ہیں۔
قاسم سوری نے کہا کہ عمران خان پر حملے کا مقدمہ درج نہیں ہوا اور اعظم سواتی کیخلاف 5مقدمات درج ہو گئے ملک میں مذاق ہو رہا ہے ایک شخص کیخلاف50،50 مقدمات درج ہو رہے ہیں۔
ان کا کہنا تھا کہ مقدمات تنگ کرنے کے لئے درج کئے جا رہے ہیں عمران خان پر قاتلانہ حملہ کرو یا مقدمات درج کروہمیں ڈرا نہیں سکتے اعظم سواتی نہیں تھکیں گے کھڑے رہیں گے۔
سینیٹر اعظم سواتی کو انتشار پھیلانے کا مقدمے میں 5 روزہ ریمانڈ پر پولیس کے حوالے کیا گیا ہے۔
خیال رہے کہ اعظم سواتی پر اداروں کے خلاف ٹویٹ اور بیان بازی سے متعلق ملک بھر میں مختلف مقدمات درج ہیں، 2 روز قبل انہیں بلوچستان پولیس نے اسلام آباد سے گرفتار کیا تھا۔
وفاقی دارالحکومت میں گرفتاری کے بعد وہ چند روز پولیس کی حراست میں رہے تھے اور ضمانت کے بعد انہیں دوبارہ گرفتار کیا گیا تھا جس کے بعد انہیں کوئٹہ لے جایا گیا۔
دوسری جانب اسلام آباد ہائی کورٹ نے اعظم سواتی کے خلاف ملک بھر میں درج مقدمات کی تفصیل کے حصول کی درخواست پر فیصلہ محفوظ کر رکھا ہے۔
