کویت کے اہم حکومتی ذرائع کی جانب سے اس بات کا انکشاف کیا گیا ہے کہ حکومت کی جانب سے پیٹرول کی قیمت میں اضافہ کرنے کا منصوبہ ہے جس کا اطلاق صرف غیرملکیوں پر ہوگا۔
کویتی خبر رساں ادارے ’القبس‘ نے باخبر حکومتی ذرائع کے حوالے بتایا کہ پیٹرول کے نرخوں میں جو اضافہ کیا جائے گا وہ عالمی مارکیٹ کے مطابق ہوگا۔
ذرائع کا کہنا ہے کہ پیٹرول کی قیمت میں ہونے والے اضافے سے کویتی شہری متاثر نہیں ہوں گے، صرف غیرملکیوں کے لیے قیمت بڑھائی جائے گی۔
ذرائع کے مطابق پیٹرول کی قیمتوں میں متوقع اضافے کی سمری تیار کرلی گئی ہے جبکہ کیے جانے والے اضافے کا تعین کرنا باقی ہے جسے حتمی نفاذ کے لیے معاشی کمیٹی کے سامنے پیش کرنے کے بعد اس کا اعلان جلد ہی کردیا جائے گا۔
دوسری جانب کویت میں ٹریفک قوانین کی خلاف ورزی کرنے والوں کی شامت آگئی، ایک ہفتے کے دوران 54,844 ٹریفک خلاف ورزیوں پر ٹکٹ جاری کی گئیں۔
کویتی ٹریفک پولیس نے 4.9 ملین آبادی والے ملک میں سڑک کے حادثات پر قابو پانے کی تیز رفتار کوششوں کے دوران ایک ہفتے میں 54,844 جرمانے کیے۔
جنرل ڈپارٹمنٹ آف ٹریفک کی طرف سے جاری کردہ اعداد و شمار سے پتہ چلتا ہے کہ 7 تا 13 ستمبر کے دوران، تقریباً 68 نابالغوں کو بھی بغیر لائسنس کے ڈرائیونگ کرنے پر قانونی کارروائی کے لیے بھیجا گیا تھا۔
اسی عرصے کے دوران 111 گاڑیوں کو ضبط کیا گیا جبکہ 1480 حادثات ریکارڈ کیے گئے۔
سعودی عرب میں آج سونے کی قیمت کیا رہی؟
ٹریفک کی خلاف ورزیوں اور سڑک حادثات کی بڑی تعداد کے ساتھ کویتی حکام ٹریفک کے ضوابط پر سخت نگرانی برقرار رکھنے کی کوشش کر رہے ہیں۔
