اسلام آباد : پیٹرول کی قیمت کے حوالے سے اس بار پاکستانی عوام کو بڑا ریلیف ملنے کا امکان ہے تاہم 30 ستمبر کو قیمتوں کا اعلان کو کیا جائے گا۔
تفصیلات کے مطابق حکومت عالمی سطح پر تیل کی قیمتوں میں نمایاں کمی کے بعد صارفین کو ریلیف فراہم کرنے پر غور کر رہی ہے تاہم قیمتوں میں کمی کے صحیح اعداد و شمار کو ابھی تک حتمی شکل نہیں دی گئی ہے۔
برینٹ خام تیل کی قیمتوں میں حال ہی میں تقریباً 0.50 ڈالر کی کمی ہوئی، جو اب تقریباً 72.27 ڈالر فی بیرل پر منڈلا رہی ہے، جبکہ امریکی خام تیل کی قیمتوں میں 37 سینٹس کی کمی واقع ہوئی ہے۔
ذرائع نے بتایا کہ یکم اکتوبر سے پیٹرولیم مصنوعات کی قیمتوں میں 3روپے تک کمی متوقع ہے جبکہ پیٹرول کی قیمت میں ایک روپیہ فی لٹر کمی کا امکان ہے تاہم پیٹرول کی قیمت کو برقرار بھی رکھا جا سکتا ہے، اس کے علاوہ ڈیزل کی قیمت میں 3روپے فی لٹر کمی ہو سکتی ہے۔
ذرائع کا کہنا ہے کہ وزیر اعظم کی منظوری کے بعد پٹرولیم مصنوعات کی قیمتوں کا اعلان 30 ستمبر کو کیا جائے گا اور نئی قیمتوں کا اطلاق یکم اکتوبر سے ہوگا۔
یاد رہے گذشتہ 15 روز قبل حکومت نے پیٹرول کی قیمت میں 10 روپے فی لیٹر کمی کی تھی ، جس سے قیمت 249.10 روپے فی لیٹر ہوگئی تھی، جب کہ ہائی اسپیڈ ڈیزل (ایچ ایس ڈی) کی قیمت میں 13.6 روپے فی لیٹر کمی ہوئی تھی، جس کی قیمت اب 249.69 روپے فی لیٹر ہے۔
