اسلام آباد : ماہر معاشیات مزمل اسلم نے خبردار کیا ہے کہ کہ پٹرولیم مصنوعات کی قیمتیں مزید بڑھ سکتی ہیں۔

تفصیلات کے مطابق ماہر معاشیات مزمل اسلم نے اے آر وائی نیوز کے پروگرام باخبر سویرا میں گفتگو کرتے ہوئے کہا کہ پیٹرول کی قیمتوں میں 2 دن پہلے ہی اضافہ کردیا گیا۔

ماہر معاشیات کا کہنا تھا کہ ڈالر بڑھنے کے بعد واضح ہوگیا تھا کہ پیٹرول کی قیمت بڑھنی ہے، پمپس نے پیٹرول فروخت کرنا بند کردیا تھا جس کی وجہ سے پریشر آیا۔

مزمل اسلم نے کہا کہ اسحاق ڈار 4 ماہ سے قیمتوں کوایڈجسٹ کررہے تھے، پیٹرول کی قیمتوں میں ابھی مزید اضافہ ہونا ہے اور پیٹرول اور ڈیزل پر مزید لیوی بھی بڑھے گی۔

آئی ایم ایف کے دورہ پاکستان کے حوالے سے ان کا کہنا تھا کہ آئی ایم ایف سبسڈی ہٹانےآرہاہے،مگر یہ ٹارگٹڈ سبسڈی کے خلاف نہیں ہے، ہمارے سسٹم میں بڑی خرابیاں ہیں۔

ماہر معاشیات نے مزید کہا کہ وفاقی حکومت کنگال ہو چکی ہے جبکہ صوبے کوئی ذمہ داری نہیں لیتے ، اخراجات کم کرنے کیلئے کمیٹی بنائی گئی، تجویز آئی ہے کہ وزرا کی تعداد کم کریں۔