کراچی: شہرقائد میں نجی آئل مارکیٹنگ کمپنیوں کی سپلائی بند ہونے سے پیٹرول کی قلت کا سامنا ہے جبکہ مختلف علاقوں میں پیٹرول پمپس بند ہونا شروع ہوگئے۔
اے آر وائی نیوز کے مطابق پیٹرول کے مصنوعی بحران کے باعث پی ایس او کے پیٹرول پمپوں پر گاڑیوں کی قطاریں لگ گئیں۔ پی ایس او اور نجی پیٹرول پمپس پر پیٹرول، ڈیزل کے حصول کے لیے لمبی لمبی قطاریں ہیں۔
کارسوار کو 5سے10لیٹر جبکہ موٹرسائیکل کو 2سے3 لیٹر پیٹرول دیا جارہا ہے۔
ذرائع کا کہنا ہے کہ رات تک پیٹرول کی سپلائی بحال نہ ہوئی تو پبلک ٹرانسپورٹ سروس بند ہوجائے گی۔ صبح تمام آئل مارکیٹنگ کمپنیوں نے شیریں جناح پر آئل ٹرمینل بند کردیے تھے۔ پی ایس او کی صرف ذوالفقار آباد آئل ٹرمینل سے سپلائی جاری ہے۔
پیٹرول کی قلت کے باعث قیمتیں بڑھ گئیں
خیال رہے کہ کیماڑی میں زہریلی گیس سے ہونے والی اموات کے بعد متصل علاقوں میں کاروباری سرگرمیاں ٹھپ ہو کر رہ گئی ہیں، جیکسن مارکیٹ سمیت دیگر چھوٹے بڑے تجاری و کاروباری مراکز بند ہیں جب کہ شہریوں میں شدید خوف و ہراس پایا جاتا ہے۔
زہریلی گیس کے اثرات کیماڑی کے آئل ٹرمینلز پر بھی مرتب ہوئے ہیں، عملے کی حفاظت کی خاطر پی ایس او سمیت دیگر آئل کمپنیوں نے ٹرمینلز بند کردیے ہیں جس سے شہر میں پیٹرول کی سپلائی متاثر ہوئی ہے۔
