ریاض: سعودی عرب میں پیٹرول ذخیرہ کرنے والے 23 پیٹرول پمپس کے خلاف کارروائی کی گئی، پرانی قیمت پر خریدا ہوا پیٹرول ذخیرہ کر کے نئی قیمت پر فروخت کرنے پر 3 سال قید اور 10 لاکھ ریال جرمانہ مقرر ہے۔
سعودی ویب سائٹ کے مطابق پرانی قیمت پر خریدا ہوا پیٹرول نئی قیمت پر فروخت کرنے کے لیے ذخیرہ کرنے والے 23 اسٹیشنوں کے خلاف کارروائی کی گئی ہے۔
ترجمان وزارت تجارت کا کہنا ہے کہ پیٹرول کے نئے نرخ نامے کے اعلان کے باعث ضابطوں کی پابندی کرنے کا جائزہ لینے کے لیے ملک بھر میں اسٹیشنوں کے دورے کیے گئے ہیں۔
ترجمان کا کہنا ہے کہ تفتیشی ٹیم کے اہلکاروں نے ملک بھر میں متعدد خلاف ورزیاں پکڑی ہیں جن میں بعض پیٹرول پمپس کی طرف سے نئی قیمت پر فروخت کرنے کے لیے پیٹرول ذخیرہ کرنے کی خلاف ورزی بھی شامل ہے۔
انہوں نے کہا کہ پیٹرول کی نئی قیمت کے متوقع اعلان کے باعث بعض اسٹیشنوں نے فروخت بند کردی تھی تاکہ اعلان کے بعد نئی قیمت پر فروخت کیا جائے، تاہم ناجائز منافع حاصل کرنے اور تجارتی ضابطوں کی خلاف ورزی پر مذکورہ اسٹیشنوں کے مالکان پر جرمانے عائد کیے گیے ہیں۔
ترجمان کا کہنا ہے کہ پرانی قیمت پر خریدا ہوا پیٹرول ذخیرہ کر کے نئی قیمت پر فروخت کرنے پر 3 سال قید اور 10 لاکھ ریال جرمانہ مقرر ہے، علاوہ ازیں خلاف ورزی کرنے والے پیٹرول پمپ کی مقامی اخبارات میں تشہیر ہوگی، خلاف ورزی دہرائی گئی تو لائسنس منسوخ ہوگا۔
