موبائل ڈسپنسرز کے ذریعے ملک میں پیٹرول، ڈیزل اور گیس کی فراہمی کی تجویز کے حوالے سے پیٹرولیم ڈویژن کا موقف سامنے آگیا ہے۔
تفصیلات کے مطابق ذرائع نے بتایا کہ پیٹرولیم ڈویژن کی جانب سے موبائل یونٹس کے ذریعے پیٹرول فراہمی کی تجویز کی مخالفت کی گئی ہے، پیٹرولیم ڈویژن نے ایس آئی ایف سی کو خط لکھ کر اپنے مؤقف سے آگاہ کردیا ہے۔
ذرائع نے کہا کہ پیٹرولیم ڈویژن نے تجویز پر تمام متعلقہ اسٹیک ہولڈرز کے ساتھ مشاورت کی، موبائل یونٹس کے ذریعے پیٹرول اور ڈیزل کی فراہمی خطرناک ثابت ہوسکتی ہے۔
موبائل یونٹس کے ذریعے ٹرانسپورٹیشن ،اسٹوریج سے شدید خطرات ہوسکتے ہیں، موبائل یونٹس اسکیم سے ریٹیل اسٹیشنز کی سرمایہ کاری پراثرات ہوں گے۔
پیٹرولیم ڈویژن کے ذرائع کا کہنا ہے کہ ملک میں ریٹیل آوٹ لیٹس کی ڈیجٹلائزیشن کا کام جاری ہے، موبائل یونٹس سے ٹیکس چوری اوراسمگل شدہ مصنوعات کا نیا راستہ کھل سکتا ہے۔
