یورپی ملک ناروے دنیا کے تیل کے سب سے بڑے برآمد کنندگان میں سے ایک ہے، جہاں اب سڑکوں پر پٹرول سے چلنے والی گاڑیوں سے زیادہ الیکٹرک کاریں دوڑتی ہیں۔
ایک رپورٹ کے مطابق ناروے دنیا کا پہلا ملک بننے کے قریب ہے جہاں پٹرول پر چلنے والی گاڑیوں کا استعمال اب جلد ہی ختم ہو جائے گا۔
نارویجن روڈ فیڈریشن کے نئے اعداد و شمار کے مطابق وہاں رجسٹرڈ 28 لاکھ نجی کاروں میں سے 7 لاکھ 54 ہزار 303 اب الیکٹرک ہیں، جب کہ 7 لاکھ 53 ہزار 905 پٹرول پر چلتی ہیں۔ ڈیزل گاڑیوں کی تعداد 10 لاکھ کے قریب ہے لیکن ان کی فروخت میں تیزی سے کمی آ رہی ہے۔
تقریباً 55 لاکھ آبادی والا یہ ملک 2025 تک نئی پٹرول اور ڈیزل کاروں کی فروخت کو ختم کرنے والا پہلا ملک بننے کا ارادہ رکھتا ہے۔ ناروے میں الیکٹرک گاڑیوں (EVs) کی فروخت کو ٹیکس میں چھوٹ اور دیگر مراعات کے ذریعے فروغ دیا جا رہا ہے۔
نارویجن روڈ فیڈریشن کے مطابق پٹرول گاڑیوں میں کمی کا یہ سنگ میل 10 سال سے بھی کم عرصے میں حاصل کیا گیا ہے، الیکٹرک گاڑیوں کی فروخت میں اضافے کے ساتھ اگست 2024 میں ناروے میں رجسٹرڈ ہونے والی 94.3 فی صد گاڑیاں الیکٹرک تھیں۔
