کراچی: پیٹرولیم ڈیلرز نے حکومت کو خبردار کیا ہے کہ پیٹرولیم سیکٹر ڈی ریگولیٹ کرنے کا فیصلہ واپس نہ لیا تو ہڑتال اور احتجاج کیا جاسکتا ہے۔
تفصیلات کے مطابق پیٹرولیم ڈیلرز نے حکومت کا پیٹرولیم سیکٹر ڈی ریگولیٹ کرنے کا فیصلہ مسترد کردیا۔
چیئرمین پیٹرولیم ڈیلرز عبدالسمیع خان نے خبردار کیا کہ حکومت نے فیصلہ واپس نہ لیا تو ہڑتال اور احتجاج کیا جاسکتا ہے۔
پیٹرولیم ڈیلرز نے وفاقی وزیرپیٹرولیم مصدق ملک کو خط لکھ دیا ہے ، عبدالسمیع خان نے بتایا کہ ڈی ریگولیٹ سےملاوٹ شدہ تیل میں اضافہ ،اسمگلنگ بڑھے گی، اس اقدام کی شدید مخالفت اور فیصلے پر نظرثانی کا مطالبہ کرتے ہیں۔
انھون نے مطالبہ کیا کہ وزیر پیٹرولیم معاملے پر پی پی ڈی اے کے وفد کیساتھ میٹنگ بلائیں۔
مزید پڑھیں : حکومت کا پیٹرولیم مصنوعات کی قیمتوں سے متعلق اہم منصوبہ
یاد رہے وفاقی حکومت نے پیٹرولیم مصنوعات کی قیمتیں ڈی ریگولیٹ کرنے کا منصوبہ بنایا ہے، پاکستان پیٹرولیم ڈیلرز ایسوسی ایشن نے حکومتی منصوبے کی مخالفت کرتے ہوئے وزیر پیٹرولیم مصدق ملک کو خط لکھ دیا تھا۔
جس میں کہا گیا تھا کہ ڈی ریگولیشن سے ملک میں اسمگل ایرانی آئل کی فروخت بڑھے گی، ملک میں غیرمعیاری تیل کی فروخت میں اضافہ ہوگا، پیٹرولیم ڈیلرز کے ملک بھر میں 15 ہزار سے زائد پیٹرول پمپس ہیں۔
منصوبے کے تحت آئل مارکیٹنگ کمپنیاں (او ایم سیز) مسابقتی نرخوں پر ایندھن فروخت کر سکیں گی تاکہ وہ اپنی مارکیٹ شیئر میں اضافہ کر سکیں، جبکہ قیمتوں کے استحکام کو یقینی بنانے کے لیے ایک حد مقرر کی جائے گی
