لاہور: ہائی کورٹ میں پٹرولیم مصنوعات کی قیمتوں میں اضافے کے خلاف درخواست دائر کر دی گئی۔
تفصیلات کے مطابق لاہور ہائی کورٹ میں پٹرولیم مصنوعات کی قیمتوں میں اضافے کے خلاف متفرق درخواست دائر کر دی گئی۔
جوڈیشل ایکٹوزم پینل کے سربراہ اظہر صدیق نے متفرق درخواست دائر کی، درخواست میں اوگرا ، وفاقی حکومت سمیت دیگر کو فریق بنایا گیا ہے۔
درخواست میں موقف اختیار کیا گیا ہے کہ بین الاقوامی مارکیٹ میں پٹرولیم مصنوعات کی قیمتوں میں کمی ہوئی ہے، پٹرولیم مصنوعات کی قیمتوں میں اضافے سے قبل کابینہ سے منظوری نہیں لی گئی۔
درخواست گزار کا کہنا تھا کہ قیمتوں میں اضافے کے لیے ٹھوس وجوہات بھی بیان نہیں کی گئی،پیٹرولیم مصنوعات میں اضافے سے مہنگائی میں اضافہ ہو جائے گا۔
درخواست میں استدعا کی گئی کہ عدالت پٹرولیم مصنوعات کی قیمتوں میں اضافے کو کالعدم قرار دے۔
یاد رہے گذشتہ روز حکومت نے پٹرول کی قیمت میں2 روپے 7 پیسے فی لیٹر ،ہائی اسپیڈ ڈیزل 2 روپے99 پیسے،مٹی کا تیل 10 روپے 92 پیسے فی لیٹر اضافہ کردیا تھا۔
