کراچی : ملک کا اقتصادی پہیہ رکنے کے باعث پٹرولیم مصنوعات کی کھپت میں بھی نمایاں کمی ریکارڈ کی گئی ہے، ڈالر کی بڑھتی ہوئی قیمت سے بھی صورتحال غیر یقینی ہے۔
تفصیلات کے مطابق ملک کے موجودہ حالات میں معاشی سرگرمیاں محدود ہونے کی وجہ سے پٹرولیم مصنوعات کی خریدو فروخت میں نمایاں کمی ریکارڈ کی گئی ہے۔
اس حوالے سے انڈسٹری ذرائع کا کہنا ہے کہ کھپت کم ہونے کے باعث تیل کے درآمدی ملک نے تیل باہر بھیجنا شروع کردیا ہے۔
ذرائع کے مطابق اپریل میں پاکستان سے ایک لاکھ64ہزار ٹن تیل برآمد کیا گیا، 2017کے بعد سے تیل برآمد کرنے کی یہ بڑی مقدار ہے، گزشتہ دو ماہ کے دوران تیل درآمد نہیں کیا گیا۔
انڈسٹری ذرائع نے بتایا ہے کہ ماہانہ بنیادوں پر آئل امپورٹس میں22 فیصد کمی جبکہ ماہانہ بنیادوں پر ایل این جی کی درآمدات میں11فیصد کمی ریکارڈ کی گئی۔
انڈسٹری ذرائع کے مطابق اس کے علاوہ اپریل میں سالانہ بنیادوں پر پٹرولیم مصنوعات کی فروخت میں46 فیصد کمی ریکارڈ کی گئی۔
معاشی سرگرمیاں محدود ہونے سے اسمگل شدہ تیل کی فروخت سے سیل میں نمایاں کمی آئی ہے اور ڈالر کے مقابلے میں روپے کی قدر میں کمی سے غیریقینی صورتحال ہے۔
