لاہور : سیکیورٹی گارڈ کی طالبہ سے زیادتی کے واقعے پر نجی کالج کے گلبرگ کیمپس کی رجسٹریشن معطل کردی گئی۔
تفصیلات کے مطابق لاہور کے نجی کالج میں طالبہ سے مبینہ زیادتی کے خلاف گلبرک کیمپس اور مسلم ٹاؤن کے طالبعلم سڑکوں پرآگئے، ٹائر اور لکڑیاں جلا کرسڑک بند کردی۔
اس دوران پولیس اورطلبا کے درمیان تصادم ہوا، پولیس تشدد سے متعدد طالبعلم زخمی ہوئے تاہم صورتحال خراب ہونے پر وزیر تعلیم رانا سکندرحیات نجی کالج پہنچے۔
پنجاب انتظامیہ نے گلبرگ کیمپس کی رجسٹریشن تاحکم ثانی معطل کرکے نوٹیفکیشن جاری کردیا۔
رانا سکندرحیات نے بچوں کو انصاف کی یقین دہانی کراتے ہوئے بتایاکہ پرنسپل نے ثبوت ڈیلیٹ کیے، آوازاٹھانے پر انتظامیہ کی جانب سے بچوں کو دھمکانے کے آڈیو پیٖغامات موجود ہیں، کالج کے جو بھی اساتذہ ملوث ہیں ان کے خلاف کارروائی ہوگی۔
وزیرتعلیم کےجاتے ہی پولیس نے مزید نفری طلب کرلی گئی اور پتھراؤ کرنے والے طلبا کو گرفتار کرنے کا فیصلہ کرلیا، جس کے بعد واٹر کینن اور پریزن وین بھی پہنچا دی گئی ہے۔
احتجاج کے باعث قرطبہ چوک کی جانب سے جیل روڈ کوہرقسم کی ٹریفک کیلئے بند کردیا گیا ہے اور شہریوں کومتبادل راستے استعمال کرنے کی ہدایت کی گئی ہے۔
یاد رہے کالج کے گارڈ نے دو روز قبل طالبہ سے زیادتی کی تھی۔
