پشاور : پشاور ہائیکورٹ نے ایف آئی اے کو شاندانہ گلزار کے خلاف کارروائی سے روک دیا اور فریقین کو جواب جمع کرانے کی ہدایت کردی۔
تفصیلات کے مطابق پشاور ہائیکورٹ میں ایف آئی اے نوٹس کے خلاف شاندانہ گلزار کی درخواست پرسماعت ہوئی،
ایڈیشنل اٹارنی جنرل نے کہا درخواست کے دائرہ اختیار پر اعتراض ہے، شاندانہ گلزار کو یہ نوٹس لاہور سے جاری ہوا، جس پر عدالت نے کہا ایف آئی اے لاہور اس صوبے کے رہائشی کے خلاف کیسے انکوائری کرتی ہے؟
عدالت نے استفسار کیا کہ کیا ایف آئی اے آفس صرف لاہور میں ہےکسی اور جگہ نہیں ؟ تو وکیل نے بتایا درخواست گزار پراداروں کے خلاف پروپیگنڈے کا الزام ہے۔
جسٹس سید ارشد علی نے کہا ہمیں بتا دیں ان پر الزام کیا ہے ، اس نے کیا وائلیشن کی ہے، نوٹس ایف آئی اے لاہور نے دیا تو یہاں پر کیسے آپ کیس کرسکتے ہیں، شاندانہ گلزار ایم این اے ہیں ، ان کے خلاف کیا الزامات ہیں؟
جس پر ایڈیشنل اٹارنی جنرل نے کہا انہوں نے قومی اداروں کے خلاف منفی پروپیگنڈاکیا ہے تو جسٹس سید ارشد علی کا کہنا تھا کہ ان کے خلاف الزامات کیا ہے وہ ہمیں بتا دیں۔
عدالت نےایف آئی اے کو شاندانہ گلزار کےخلاف کارروائی سے روک دیا اور فریقین کوجواب جمع کرانےکی ہدایت کرتے ہوئے سماعت پچیس مارچ تک ملتوی کردی۔
