The news is by your side.

Advertisement

‘ادویات کی قیمتوں میں اضافے پر نظرثانی کرکے کم سےکم قیمت پر لائیں’

پشاور : پشاور ہائی کورٹ کے قائم مقام چیف جسٹس قیصر رشید نے دواؤں کی قیمتوں میں اضافے پر برہمی کا اظہار کرتے ہوئے ڈرگ ریگولیٹری اتھارٹی سے دواؤں کی قیمتوں میں کمی پر رپورٹ طلب کرلی۔

تفصیلات کے مطابق پشاور ہائی کورٹ میں دواؤں کی قیمتوں میں اضافےسےمتعلق سماعت ہوئی ، قائم مقام چیف جسٹس قیصر رشید نے دواؤں کی قیمتوں میں اضافے پر برہمی کا اظہار کیا۔

ڈپٹی ڈائریکٹر ایف آئی اے نے دواؤں میں اضافے فہرست پڑھ کر سنائی ، جس پر قائم مقام چیف جسٹس قیصررشید نے کہا کہ سی ای او صاحب آپ کو قیمتوں میں اضافے کا پتہ ہی نہیں، صبح سے آپ عدالت میں غلط بیانی کررہے ہیں، اتنے بڑے عہدے پر ہیں اورعدالت میں غلط بیانی کررہے ہیں، کیو ں نہ آپ کے خلاف کارروائی شروع کریں۔

جسٹس قیصررشید کا کہنا تھا کہ کس نے آپ کو اتنے بڑے عہدے پر بٹھایا ہے، عوام کی مشکلات کا آپ لوگوں کو احساس ہی نہیں ، عوام میں اتنی مہنگی دوائیں خریدنے کی سکت ہی نہیں۔

عدالت نے کہا کہ عوام پہلے ہی مہنگائی سے پریشان تھے ، دواؤں کی قیمتوں میں اضافہ کرکے ان کی مشکلات میں مزید اضافہ کیا، سی ای او صاحب دواؤں کی قیمت میں اضافے کی فہرست پرنظرثانی کریں اور قیمتوں میں اضافے پر نظرثانی کرکے اس کو کم سےکم قیمت پر لائیں۔

جسٹس قیصررشید نے سی ای او ڈرگ ریگولیٹری اتھارٹی سے دواؤں کی قیمتوں میں کمی پر رپورٹ طلب کرتے ہوئے اتائی ڈاکٹروں اور غیر قانونی کلینکس اور لیبزکےخلاف کارروائی جاری رکھنے کا حکم دے دیا اور سماعت 17 دسمبر تک ملتوی کردی۔

Comments

یہ بھی پڑھیں