منیلا: فلپائن میں شدید طوفان اور بارشوں کے نتیجے میں ہلاکتوں کی تعداد 98 ہو گئی ہے۔
تفصیلات کے مطابق فلپائن کے سیلاب زدہ علاقوں سے مزید لاشیں نکال لی گئی ہیں، جس سے ٹراپیکل طوفان ’نلگے‘ سے مرنے والوں کی تعداد کم از کم اٹھانوے ہو گئی ہے۔
غیر ملکی میڈیا رپورٹس کے مطابق فلپائن کی ڈیزاسٹر ایجنسی نے کہا کہ نصف سے زیادہ ہلاکتیں طوفانی سیلاب اور لینڈ سلائیڈنگ کی وجہ سے ہوئی ہیں، ایجنسی نے بتایا کہ تقریباً 63 افراد لاپتا ہیں، جب کہ 69 افراد زخمی ہوئے۔
طوفان نے جنوبی جزیرے منڈاناؤ کے دیہات کو تباہ کر دیا ہے، بنگسامورو کے شہری دفاع کے سربراہ کا کہنا تھا کہ دو دن کے بعد لاپتا افراد کے زندہ بچ جانے کے امکانات تقریباً صفر ہیں۔
رپورٹس کے مطابق اس طوفان نے پانچ مرتبہ لینڈ فال کیا ہے، اور اس نے بڑے پیمانے پر فصلوں کو تباہ کر دیا ہے، کئی علاقوں میں بجلی بھی منقطع ہو گئی ہے۔
فلپائن کے صدر فرڈینینڈ مارکوس جونیئر نے پیر کے روز سیلاب زدہ علاقوں کا فضائی جائزہ لیا، انھوں نے طوفان سے ہونے والی ہلاکتوں کی تعداد پر صدمے کا اظہار کیا۔
