کراچی : پی آئی کے پائلٹوں کی غیرقانونی اورغیراخلاقی حرکتوں کا حکام نے سختی سے نوٹس لے لیا، دونوں کپتانوں کے خلاف تحقیقات جلد مکمل کا حکم دے دیا گیا۔
تفصیلات کے مطابق پی آئی اے کے بورڈ آف ڈائریکٹرز کا اجلاس چیئرمین پی آئی اے عرفان الہٰی کی صدارت میں ہوا۔
اجلاس میں حالیہ دنوں کپتان عامر ہاشمی کے دوران پرواز نیند پوری کرنے اور دوسرے پائلٹ کا ٹوکیو سے بیجنگ آنے والی پرواز میں غیر ملکی خاتون مسافر کو کاک پٹ میں بٹھانے پر بورڈ کے ارکان نے اظہار برہمی کیا۔
اجلاس میں قائم مقام سی ای او کو بریفنگ دی گئی کہ پی آئی اے انتظامیہ نے ان واقعات کا سختی سے نوٹس لیاہے دونوں کپتانوں کے خلاف تحقیقات جاری ہے۔ ان کپتانوں کی حرکتوں کی وجہ سے پی آئی اے کی دنیا بھر میں جگ ہنسائی ہوئی ہے۔
بورڈ آف ڈائریکٹرز کے اجلاس میں ایئربس 310اے کی مبینہ فروخت کے معاملے پر بھی پی آئی اے انتظامیہ سے باز پرس کی گئی۔ ڈائریکٹرز نے بوئنگ 777 کی ڈرائی لیز اور ویٹ لیز کے متعلق تفصیلات طلب کرلیں۔
اجلاس میں ہدایت کی گئی کہ پی آئی اے کو مالی بحران سے نکالنے کیلئے ہنگامی بنیادوں پر اقدامات کئے جائیں، ذرائع کے مطابق بورڈ آف ڈائریکٹرز نے 2016 کے چھ ماہ کی مالی آڈٹ کی بھی منظور دی۔
