کراچی : پی آئی اے انتظامیہ نے فضائی میزبانوں کی ڈیوٹی اوقات کار میں اضافے کے فیصلے کو واپس لے لیا، بارہ گھنٹے پر مبنی اوقات کار دوبارہ بحال کردیئے۔ فضائی میزبانوں کے اندرون وبیرون ملک ہوٹل کی سہولت ختم کردی گئی۔
تفصیلات کے مطابق بغیر تیاری کے احکامات جاری کرنے والی پی آئی اے انتظامیہ نے اپنے ہی فیصلے پر یو ٹرن لے لیا۔ گزشتہ روز پی آئی اے فضائی میزبانوں کے اوقات کار بارہ گھنٹے سے سولہ گھنٹے کرنے کے بعد بحال کردیئے گئے۔
انتظامیہ نے جمعے کو جاری کردہ احکامات میں درج سولہ گھنٹے ڈیوٹی پر عمل درآمد موخر کرتے ہوئے نیا حکم جاری کردیا۔ ئئے ڈیوٹی اوقات کار کے لئے انتظامیہ نے مالی فوائد کا اعلان بھی کیاتھا۔
جاری نئےاحکامات میں سول ایوی ایشن اتھارٹی سے درکار اجازت نامہ اور ائرلائن مینول میں تبدیلی تک دس گھنٹے ڈیوٹی ہی برقرار رکھنے کا فیصلہ کیا گیا ہے۔ واضح رہے کہ فضائی میزبانوں نے نئے اوقات کار کو ایئرلائن مینول اور میڈیکل نقطہ نظر سے بھی نقصان دہ قرار دیا تھا۔
فضائی میزبانوں کے اندرون و بیرون ملک ہوٹل کی سہولت ختم
علاوہ ازیں قومی ایئرلائن میں اصلاحات کا عمل جاری ہے، اس سلسلے میں غیر ضروری اخراجات کی روک تھام کیلئے اہم اقدامات کیے گئے ہیں، انتظامیہ نے فضائی میزبانوں کے اندرون و بیرون ملک ہوٹل کی سہولت ختم کردی۔
ذرائع کے مطابق سعودی عرب میں فضائی میزبانوں کے ہوٹل کی سہولت اور قیام پرسالانہ 600ملین روپے کے اخراجات آتے تھے۔ اب جدہ اور مدینہ جانے والی تمام پروازوں پر فضائی میزبانوں کا اپ اینڈ ڈاؤن ہوگا۔
بینکاک، کوالا لمپور میں بھی ہوٹل کی سہولت ختم کردی گئی، ان مذکورہ سیکٹرز پر ہوٹل کی سہولت ختم کرنے سے پی آئی اے کو سالانہ ایک ارب روپے سے زائد کی بچت ہوگی۔
