کراچی : پی آئی اے کے سی ای او ایئر مارشل ارشد ملک نے پی آئی اے میں گاڑیوں کے غیر ضروری استعمال پر پابندی عائد کردی، ایک سے زائد گاڑیاں استعمال کرنے والے افسران کی فہرست مرتب کرلی گئی۔
تفصیلات کے مطابق پی آئی اے کے سی او نے وزیراعظم عمران خان کی ہدایت پر کفایت شعاری مہم شروع کردی، ایئرمارشل ارشد ملک نے ادارے کے تمام افسران پر گاڑیوں کے غیر ضروری استعمال پر پابندی عائد کردی۔
جن افسران کے زیر استعمال ایک سے زائد گاڑیاں ہیں ان کی فہرست مرتب کی جارہی ہے، اس سلسلے میں ذرائع کا کہنا ہے کہ گاڑیوں کی واپسی کا عمل شروع کردیا گیا ہے۔
یونین اور ایسوسی ایشن افسران گاڑیوں کا ناجائز استعمال کررہے تھے، اس کے علاوہ غیر استعمال شدہ گاڑیوں کو نیلام کرنے پر بھی غور کیا جارہا ہے، جس سے پی آئی اے کے اخراجات کو کم کرنے میں مدد ملے گی۔
ذرائع کے مطابق گاڑیوں کے استعمال پر ماہانہ لاکھوں روپے فیول کے اخراجات ہورہے تھے، پی آئی اے کے سی ای او نے دفتری ماحول کو بہتر بنانے کے احکامات جاری کردیئے۔
حکم نامہ میں کہا گیا ہے کہ کوئی بھی افسر سی بی اے یونین یا ملازمین دفاتر میں کھانا نہیں کھائیں گے، تمام افسران و ملازمین دوپہر کا کھانا کیفے ٹیریا میں کھائیں گے، دفاتر میں کوئی افسر کھانا کھاتے ہوئے پایا گیا تو اس کے خلاف سخت کارروائی کی جائے گی۔
