کراچی : پی آئی اے کے سی ای او مشرف رسول کی تعیناتی کالعدم قرار پانے کے بعد ادارے کا بورڈ آف ڈائریکٹرز قائم مقام سی ای او کا فیصلہ نہ کرسکا۔
تفصیلات کے مطابق سپریم کورٹ کے فیصلے کے بعد پاکستان انٹرنیشنل ایئرلائن کے چیف ایگزیکٹو آفیسر مشرف رسول اپنی ذمہ داریوں سے الگ ہوگئے ہیں۔
ادارے میں سی ای او کی تعیناتی سے متعلق پی آئی اے بورڈ آف ڈائریکٹرز کا ہنگامی اجلاس منعقد ہوا، اس حوالے سے ذرائع کا کہنا ہے کہ سیکریٹری ثاقب عزیز ذاتی طور پر چیف کمرشل افسر کی تعیناتی کے حق میں ہیں، سیکریٹری ایوی ایشن کی سربراہی میں قائم کمیٹی سی ای او کا فیصلہ نہ کرسکی۔
ذرائع کے مطابق اجلاس میں قائم مقام چیف ایگزیکٹو افسر کا معاملہ وفاق کو بھجوانے کا فیصلہ کیا گیا ہے، وفاق کو قائم مقام سی ای او کے لئے3سے 4نام بھجوائیں گے۔
مزید پڑھیں: پی آئی اے کے سی ای او مشرف رسول کی تعیناتی کالعدم قرار
مجوزہ طور پر نیئرحیات، اعجاز مظہر ،عامر علی کے نام بھیجے جائیں گے، اس کے علاوہ ان ناموں میں سابق ایم ڈی اور بورڈ رکن طارق کرمانی اور چیف ایچ آر کا نام بھی شامل ہیں۔
