کراچی :قومی ایئرلائن نے مسافروں کو جدید طرز پر سہولیات فراہم کرنے کیلئے لاہور اور کراچی ایئرپورٹ کے بزنس لاؤنچز کی تزئین وآرائش کا فیصلہ کرلیا۔
تفصیلات کے مطابق قومی ایئرلائن نے لاہور اور کراچی ایئرپورٹ کے بزنس لاونچز کی تزئین وآرائش کا فیصلہ کرلیا ، لاہور ایئرپورٹ کےانٹرنیشنل لاونچ اور کراچی ایئرپورٹ کے ڈومیسٹک لاونچ کی تزئین و آرائش ہوگی۔
پی آئی اے انتظامیہ کا کہنا ہے کہ فیصلہ مسافروں کو جدید طرز پر سہولیات فراہم کرنے کے لیے کیا گیا، پی آئی اے نے انٹیریئر ڈیزائنر اور آرکیٹیکچر فرمز سے خدمات طلب کرلی ہیں۔
انتظامیہ کا کہنا تھا کہ انٹرنل اسٹرکچر ،فرنیچر تبدیلی، لائٹنگ، واش رومز ،الیکٹریکل اشیاء کی تنصیب ہوگی ، خواہش مند فرمز 14جون 2022 تک بڈز جمع کرا سکیں گی۔
خیال رہے قومی ایئرلائن نے ملک کے سب سے بڑے پری حج فلائٹ آپریشن کا اعلان کردیا ہے، پی آئی اے کی پہلی پرواز 6 جون کو اسلام آباد سے مدینہ کیلئے روانہ ہوگی۔
پی آئی اے انتظامیہ کا کہنا ہے کہ 200 پروازوں کے ذریعے 5 بڑے شہروں اسلام آباد،کراچی ، لاہور ،ملتان اور کوئٹہ سے عازمین کو حجاز مقدس پہنچائے گی جبکہ 200پروازوں کے ذریعے حجاج کرام کی وطن واپسی ہوگی۔
