کراچی : قومی ایئر لائن پی آئی اے کے فضائی بیڑے میں 2 نئے طیارے شامل کرنے کا فیصلہ کیا گیا، طیارے آئندہ سال 2019 کی پہلی سہ ماہی میں شامل کئے جائیں گے۔
تفصیلات کے مطابق پی آئی اے کے چیئرمین اور چیف ایگزیکٹو آفیسر محمد ثاقب عزیز کی زیر صدارت اجلاس ہوا، اجلاس میں ایئر لائن کی گزشتہ مہینوں کی کار کردگی کا بھی جائزہ لیا گیا۔
اجلاس میں پی آئی اے کے فضائی بیڑے میں 2 نئے طیارے شامل کرنے کا فیصلہ کیا گیا ، طیارے آئندہ سال 2019 کی پہلی سہ ماہی میں شامل کئے جائیں گے۔
چیئرمین پی آئی اے کا کہنا تھا کہ ایئربس اے320کی جانچ جاری ہے، طیارے پیپرا قوانین کے مطابق ڈرائی لیز پر حاصل کئے جا رہے ہیں۔
اجلاس میں اس بات پر غور کیا گیا کہ مارکیٹ کی ضروریات کو پوراکرنے کے لئے فضائی بیڑے میں اضافہ وقت کی اہم ضرورت ہے کیونکہ موجودہ طیاروں سے مسافروں کی ضروریات پورا کرنا مشکل ہو رہا ہے۔
ثاقب عزیز نے کہا کہ دو نئے طیاروں کی شمولیت کے بعد پی آئی اے کو اپنے فضائی آپریشن کو وسعت دینے میں مدد ملے گی اور مسافروں کی تعداد میں بھی اضافہ ہوگا۔
پی آئی اے کا کہنا تھا کہ یہ طیارے اندرون ملک اور علاقائی روٹس کی پروازوں کے لئے استعمال کئے جائیں گے۔علاقائی روٹس میں خلیجی اور مشرق بعید کے ممالک شامل ہیں۔
0
20
