کراچی : قومی ایئرلائن (پی آئی اے) نے بوئنگ 777 طیارے کے 2 انجن فروخت کرنے کا فیصلہ کرتے ہوئے انجن کی فروخت سے متعلق ٹینڈر طلب کرلئے۔
تفصیلات کے مطابق قومی ایئرلائن (پی آئی اے) نے بوئنگ 777 طیارے کے 2 انجن فروخت کرنے کا فیصلہ کرلیا ہے۔
پی آئی اےانتظامیہ نےانجن کی فروخت سے متعلق ٹینڈر طلب کرلئے ، حکام کا کہنا ہے کہ 777 طیارے کا انجن بلندی تک اڑانے کی صلاحیت رکھتاہے ، خواشمند افراد انجن کے ٹینڈر حاصل کرنے کے لیئے درخواست دے سکتے ہیں۔
حکام نے مزید کہا کہ انجن خریدنےوالے خواہشمند کیلئے دونوں انجن ساتھ خریدنےکی شرط نہیں رکھی گئی، خواہشمند 28 مارچ 2022 تک درخواستیں جمع کراسکتے ہیں۔
گذشتہ سال اگست میں پی آئی اے نے گلگت ایئرپورٹ پر کھڑا اے ٹی آر طیارہ 8.3 ملین روپے میں فروخت کردیا تھا ، طیارے کی نیلامی میں کامیاب بولی گلگت کے مقامی ٹھیکیدار کو دی گئی۔
ذرائع کے مطابق نیلامی شعبہ انجینئرنگ کی جانب سے فراہم رپورٹ کی روشنی میں کی گئی جبکہ ناکارہ اے ٹی آر طیارے کے انجن، دیگر سامان وزن کے حساب سے فروخت کیا گیا۔
