کراچی: قومی ایئرلائن (پی آئی اے) نے جعلی ڈگری پر نکالے گئے ملازمین کی تفصیلات ایف آئی اے کو فراہم کر دیں۔
تفصیلات کے مطابق پاکستان انٹرنیشنل ایئرلائن کی انتظامیہ نے ایف آئی اے حکام کو جعلی ڈگریوں کے الزامات پر نکالے گئے ملازمین کی تفصیلات فراہم کر دی ہیں۔
ایف آئی اے اینٹی کرپشن سرکل نے قومی ایئرلائن سے برطرف ملازمین کی تنخواہوں اور دیگر مراعات کی تفصیلات مانگی تھیں، پی آئی اے کے مطابق 2016 سے 2023 تک ملازمتوں سے برخاست ملازمین کی تعداد 14 ہے۔
پی آئی اے انتظامیہ نے مذکورہ ملازمین کے خلاف جعلی اور بوگس ڈگریوں کے الزامات کے سبب کارروائیاں کی تھیں۔
ذرائع کا کہنا ہے کہ نکالے گئے پی آئی اے ملازمین میں ڈپٹی چیف پائلٹ آفیسر، بیگیج اٹینڈنٹ، سینئر ٹیکنیشن، سپروائزر سمیت دیگر شامل ہیں، جن کا تعلق پسنجر سروس، بکنگ آفس، فوڈ سروس سیکشن، پسنجر ہینڈلنگ، کارگو سیلز اینڈ سروس سیکشن سے تھا۔
