کوئٹہ : قومی ایئرلائن پی آئی اے کے ملازمین کورونا وائرس کا شکار ہونے لگے ، کوئٹہ کے پانچ ملازمین میں وائرس کی تصدیق ہوگئی ہے، جس کے بعد تمام ملازمین کو سیلف قرنطینہ میں بھیج دیا گیا ہے۔

تفصیلات کے مطابق پی آئی اے کوئٹہ کے پانچ ملازمین کورونا وائرس سے متاثر ہوگئے ، جس کی پی آئی اے کے جی ایم میڈیکل سروس نے تصدیق کردی ہے۔

پی آئی اے کے شعبہ صحت کی انتظامیہ کے مطابق کوئٹہ اسٹیشن پر 22 ملازمین کے کورونا ٹیسٹ کیے گئے تھے، جن میں سے پانچ ملازمین متاثر نکلے۔ ان میں ایک خاتون ملازمہ بھی شامل ہیں، تمام ملازمین کو سیلف قرنطینہ میں بھیج دیا گیا ہے، بعد میں مزید ٹیسٹ کئے جائیں گے۔

پی آئی اے کوئٹہ بکنگ آفس اور دیگر دفاتر میں کام کر نے والے عملے کے بھی ٹیسٹ کیے گئے۔

گذشتہ روز نیشنل ڈیزاسٹر مینیجمنٹ اتھارٹی (این ڈی ایم اے) نے پی آئی اے کو ایک لاکھ ڈالرکی حفاظتی کٹس عطیہ کی تھیں ، حفاظتی کٹس کا استعمال پی آئی اے کا عملہ دوران پرواز کرے گا۔

چند روز قبل پاکستان انٹرنیشنل ایئرلائن کی آسٹریلیا سے لاہور جانے والی پرواز پر تعینات پائلٹ اور 3 فضائی میزبان کا کورونا ٹیسٹ مثبت آیا تھا۔