کراچی: یورپی روٹس پر سفری سہولیات کی فراہمی کے لیے قومی ایئرلائن نے چارٹر آپریٹرز سے پیش کشیں طلب کر لیں۔
تفصیلات کے مطابق پی آئی اے کے یورپی روٹس پر پروازیں آپریٹ کرنے کے معاملے میں قومی ایئر لائن نے چارٹر پروازوں کے لیے مختف ایئر لائنز اور چارٹر آپریٹرز سے پیش کشیں طلب کر لی ہیں۔
طلب کردہ پیش کشوں میں طیاروں کا یورپی یونین ایوی ایشن سیفٹی ایجنسی سے سرٹیفائیڈ ہونا ضروری قرار دیا گیا ہے۔
قومی ایئر لائن کو چارٹر پروازوں کے لیے 250 سے زائد نشستوں کے حامل وائڈ باڈی طیاروں کی آفرز درکار ہیں، چارٹر آپریشن کے لیے درکار طیاروں کو سال 2004 ساختہ ہونا بھی لازمی قرار دیا گیا ہے۔
چارٹر آپریشن کی 6 ماہ پر مبنی مدت دسمبر 2022 تا مئی 2023 مقرر کی گئی ہے۔
چارٹر آپریشن کے ذریعے قومی ایئر لائن کے مسافروں کو برطانیہ اور یورپی سیکٹرز پر براہ راست سفری سہولیات دستیاب ہوں گی۔
