کراچی: باکمال ایئر لائن کا ایک اور لاجواب کارنامہ سامنے آ گیا ہے، کنفرم بکنگ کے حامل مسافروں کو چھوڑ کر مقررہ وقت سے 6 گھنٹے قبل ہی پی آئی اے پرواز مدینہ سے پاکستان کے لیے روانہ ہو گئی۔

اے آر وائی نیوز کے مطابق لاہور کے 21 مسافروں کا گروپ ساڑھے 9 بجے رات کی پرواز کے لیے مقررہ وقت پر مدینہ ایئر پورٹ پہنچا تو انکشاف ہوا کہ رات کی پرواز 6 گھنٹے قبل دوپہر 3 بجے ہی جا چکی ہے۔

قومی ایئر لائن نے مسافروں کو پرواز کی جلد روانگی سے متعلق آگاہ ہی نہیں کیا، دوسری طرف 8 مئی کی پرواز پی کے 9784 کی کنفرم ٹکٹ کے حامل 21 مسافر کے پاس اگلی پرواز کی بکنگ بھی موجود نہیں۔

اس غیر متوقع صورت حال سے پریشان خواتین، بچوں اور مرد مسافروں پر مشتمل گروہ کے پاس ہوٹل میں رہائش کے لیے رقم بھی موجود نہیں ہے۔

ذرائع کا کہنا ہے کہ مسافروں کو سیالکوٹ کی پرواز میں دستیاب نشستوں پر ایڈجسٹ کیا جائے گا،نشستوں کی کمی پر باقی مسافر لاہور کی پرواز میں ایڈجسٹ ہوں گے، جب کہ باقی رہ جانے والے مسافروں کو ہوٹل فراہم کیا جائے گا۔