کراچی : پی آئی اے کی پہلی حج پرواز 291 عازمین حج کو لے کر کراچی ایئرپورٹ سے مدینہ منورہ روانہ ہوگئی، ایئر وائس مارشل عرفان ظہیر نے عازمین کو رخصت کیا۔
ترجمان پی آئی اے کے مطابق کراچی ایئرپورٹ سے پی آئی اے کی پہلی پرواز پی کے 743 سے 291 عازمین حج مدینہ منورہ روانہ ہوئے۔
پی آئی اے پریسشن انجینئرنگ کمپلیکس پی ای سی کے ڈائریکٹر ائروائس مارشل عرفان ظہیر نے عازمین حج کو رخصت کیا اور پھولوں کے ہار پہنائے۔
اس موقع پر ارض مقدس جانے والے خوش نصیبوں کو پی آئی اے کی جانب سے چھتریاں بھی تقسیم کی گئیں، حجاج کرام سے پاکستان کی سلامتی اور پی آئی اے کی ترقی کے لئے خصوصی دعاؤں کی درخواست کی گئی۔
ذرائع کے مطابق سی ای او پی آئی اے عامر حیات حج آپریشن کی خود نگرانی کررہے ہیں، ائرپورٹ پر عازمین حج کی معاونت کے لیے خصوصی ٹیم مصروف رہی۔
ذرائع کے مطابق وزیر ہوابازی خواجہ سعد رفیق کی ہدایات پر پی آئی اے انتظامیہ کی جانب سے عازمین حج کو ہرممکن سہولیات فراہم کی جا رہی ہیں۔
پی آئی اے اب تک مجموعی طور پر تقریبا 2ہزار سے زائد عازمین حج کو سعودی عرب پہنچا چکی ہے۔ پی آئی اے کا قبل از حج آپریشن 3 جولائی کو اختتام پزیر ہوگا جبکہ بعد از حج کی پروازیں 14 جولائی سے شروع ہوں گی اور 13 اگست تک جاری رہیں گی۔
