کراچی: قومی ایئرلائن (پی آئی اے) کے ڈپٹی اسٹیشن منیجر برمنگھم کا انٹرمیڈیٹ سرٹیفکیٹ بوگس نکلا ہے۔
تفصیلات کے مطابق برمنگھم میں پے گروپ 4 کے مقامی ملازم جاوید اقبال باجوہ کو شوکاز نوٹس جاری کیا گیا ہے کیوں کہ ان کے انٹرمیڈیٹ سرٹیفکیٹ کے بوگس ہونے کا انکشاف ہوا ہے۔
30 جولائی کو ڈپٹی اسٹیشن منیجر کے نام جاری شوکاز نوٹس کے مطابق جاوید اقبال باجوہ کو 7 روز میں تحریری جواب جمع کرانے کا کہا گیا ہے۔
نوٹس میں لکھا گیا ہے کہ ’’آپ کی جانب سے پیش کردہ تعلیمی دستاویزات کو تصدیق کے لیے متعلقہ تعلیمی بورڈ روانہ کیا گیا، 20 جولائی 2024 کو بورڈ آف انٹرمیڈیٹ اینڈ سیکنڈری ایجوکیشن سے موصول جواب کے مطابق آپ کا انٹرمیڈیٹ سرٹیفکیٹ بوگس قرار دیا گیا ہے۔‘‘
شوکاز متن کے مطابق یہ فعل ایئر لائن کی ایمپلائز ڈسپلنری پالیسی 2019 کی متعلقہ شقوں کی خلاف ورزی ہے، 7 روز میں جواب نہ دینے کی صورت میں جاوید اقبال باجوہ کے خلاف ایئر لائن قوانین اور قواعد کے مطابق مزید کارروائی کی جائے گی۔
ذرائع کے مطابق جاوید اقبال باجوہ قومی ایئر لائن کا کئی دہائیوں سے ملازم ہے، جاوید اقبال نے دوران ملازمت برطانیہ منتقل ہونے پر وہاں کا مقامی ریگولر ملازم کا اسٹیٹس حاصل کیا۔ پی آئی اے کے ترجمان عبداللہ خان کے مطابق جاری شوکاز نوٹس کا مقررہ مدت میں جواب کا انتظار کیا جائے گا، اور سرٹیفکیٹ کے اصل ہونے کا ثبوت فراہم نہ کیے جانے پر ملازم کے خلاف تادیبی کارروائی کی جائے گی۔
