The news is by your side.

Advertisement

ملائیشیا میں پی آئی اے کے پھنسے مسافر پہنچ گئے

کراچی: قومی ایئر لائن کی کوالالمپور پرواز کے مسافروں کی بڑی تعداد اسلام آباد پہنچ گئی ہے۔

اے آر وائی نیوز کے مطابق پی آئی اے کی کوالمپور پرواز کے مسافروں کی متبادل ذریعے سے واپسی ہو گئی ہے، 118 مسافر براستہ دبئی پرواز نمبر ای کے 614 کے ذریعے اسلام آباد پہنچ گئے۔

قومی ایئر لائن کے ترجمان نے بتایا کہ یہ پرواز پاکستانی وقت کے مطابق دبئی سے شام 7 بج کر 36 منٹ پر روانہ ہوئی تھی۔

ترجمان نے مزید بتایا کہ ایک پرواز کیو آر 632 دوحہ سے شام 8 بج کر 20 منٹ پر روانہ ہوئی ہے جو 54 مسافروں کو لے کر رات 1 بج کر 40 منٹ پر اسلام اباد پہنچے گی۔

پی آئی اے کے بوئنگ 777 طیارے کی لیز سے متعلق اہم انکشاف

یاد رہے کہ گزشتہ روز پی آئی اے کے 777 بوئنگ طیارے کو کوالالمپور ایئر پورٹ پر روک لیا گیا تھا، طیارے کو لیز کمپنی کو ادائیگی نہ ہونے پر روکا گیا تھا۔

آج اس سلسلے میں انکشاف ہوا کہ ملائیشیا میں پی آئی اے کے طیارے کو روکنے میں مبینہ طور پر بھارتی لابی کی سازش شامل ہے، لیز پر لیے گئے طیارے کی کمپنی کا مالک اور اہم شعبوں پر تعینات ڈائریکٹر کا تعلق بھارت سے ہے۔

ملائیشیا میں تعینات پاکستانی ہائی کمشنر آمنہ بلوچ کا کہنا تھا کہ معاملہ قانونی ہے اور پی آئی اے کے قانونی ماہرین ہی اسے دیکھیں گے، البتہ ہائی کمیشن پی آئی اے اور قانونی ماہرین کو ہر ممکن تعاون فراہم کرے گا۔

Comments

یہ بھی پڑھیں