کراچی : ترجمان پی آئی اے کا کہنا ہے کہ طیارہ حادثے میں جاں بحق ہونے والے 41 افراد کی میتیں شناخت کے بعد لواحقین کے سپرد کر دی گئی ہیں، میتوں کو وزیراعظم کی خصوصی ہدایات پر گھروں تک پہنچایاجارہا ہے۔
تفصیلات کے مطابق پی آئی ا ے کے ترجمان کا کہنا ہے کہ کراچی میں پی آئی اے طیارہ حادثے میں جاں بحق ہونے والوں کی تعداد 97 ہے ، ابھی تک 41 میتیں شناخت کے بعد لواحقین کے سپرد کر دی گئی ہیں۔
ترجمان کے مطابق پی آئی اے نے لواحقین کو انٹرنیشنل اور ڈومیسٹک ٹکٹیں جاری کیں،اب تک 4 میتیں لاہور ، 3 اسلام آباد پہنچائی جا چکی ہیں ،حادثے کا شکار میتوں کو وزیراعظم کی خصوصی ہدایات پر ان کے گھروں تک پہنچایا جارہا ہے۔
پی آئی اے کا مستعد عملہ اور رضاکار لواحقین کی خدمت کیلئے 24 گھنٹے ایمرجنسی ریسپانس سنٹر میں مصروف عمل ہے، پی آئی اے کے ائیرپورٹ ہوٹل اور قصر ناز میں 32 لواحقین اور حادثے کے باعث بے گھر ہونے والے 13 افراد کو منتقل کیا۔
ترجمان کا کہنا تھا کہ لواحقین کے لئے پی آئی اے نے تدفین کے زمرے میں فوری طور پر 10 لاکھ روپے فی کس ان کے گھروں میں پہنچانے شروع کردئیے ہیں جبکہ متاثرہ گھروں اور املاک کو ہونے والے نقصان کا تخمینہ لگانے کیلئے سروے ٹیم نے اپنا کام شروع کردیا ہے۔
پی آئی اے کی جانب سے اپیل کی جارہی ہے حادثے کی اصل وجہ کا تعین صرف تحقیقات سے سامنے آئیں گی ، محدود معلومات اور چند ویڈیوز کی بنا پر ذمہ داری کا تعین کرنا نامناسب ہے، یہ ایک قومی المیہ ہے اس وقت غیر ذمہ داری کا مظاہرہ کرنا یا ایک فشاری گروہ کی جانب سے اپنے مفادات کو فروغ دینا قابل مذمت عمل ہے۔
یاد ریے گذشتہ روز ایدھی فاؤنڈیشن کے سربراہ فیصل ایدھی نے لاشیں بغیر شناخت لے جانے کا دعویٰ کیا تھا ، فیصل ایدھی نے بی بی سی سے گفتگو کرتے ہوئے بتایا تھا کہ لواحقین اجازت نامے کے بغیر زبردستی لاشیں لے جارہے ہیں جن کی ابھی تک شناخت نہیں ہوئی ہے۔
