پنجگور: پی آئی اے کی کراچی سے جانے والی پرواز کو پنجگور ایئرپورٹ پر حادثہ پیش آیا، طیارہ دوران لینڈنگ رن وے سے اتر گیا۔
تفصیلات کے مطابق پاکستان انٹرنیشنل ایئرلائنز کی کراچی سے جانے والی پرواز پی کے 517 نے جیسے ہی پنجگور ایئرپورٹ پر لینڈنگ کی تو طیارہ رن وے سے بے قابو ہوکر کچی زمین پراترگیا۔
حادثے کے باعث طیارے کے ٹائروں کونقصان پہنچا تاہم طیارے میں سوارتمام مسافرمحفوظ رہے۔
ترجمان پی آئی اے کے مطابق پرواز پی کے517 کوپنجگورمیں رن وے سے ہٹ کرلینڈنگ کرنا پڑی جس کے باعث طیارے کے ٹائروں کو معمولی نقصان پہنچا۔
ترجمان نے مزید کہا کہ طیارے میں سوار تمام مسافر محفوظ رہے اور گھروں کو جا چکے ہیں، ٹائروں کونقصان کے باعث واپسی کی پرواز میں تاخیرمتوقع ہے۔
یاد رہے کہ رواں سال 9 مئی کو ڈیرہ غازی خان سے کراچی جانے والے اے ٹی آر طیارے کے انجن میں ٹیک آف کرتے ہی آگ لگ گئی تھی، پائلٹ نے ہنگامی لینڈنگ کرتے ہوئے طیارے کو بحفاظت ڈی جی خان ایئرپورٹ پراتار لیا تھا۔
واضح رہے کہ گزشتہ سال 21 اکتوبر کو ٹورنٹو ایئرپورٹ پر پی آئی اے کا طیارہ ایندھن فراہم کرنے والی گاڑی سے ٹکرا گیا تھا، حادثے میں طیارے کو نقصان پہنچا تھا۔