کراچی : قومی ایئرلائن ( پی آئی اے) یوکرین میں پھنسے پاکستانی طلبا کو لانے کیلئے خصوصی پرواز چلانے کو تیار ہے ، ایئرمارشل ارشد ملک کا کہنا ہے کہ جیسے ہی گرین سگنل ملے گا ، طلبا کو پاکستان پہنچادیں گے۔
تفصیلات کے مطابق یوکرین میں پھنسے ہوئے پاکستانی طلبا کو وطن واپس لانے کیلئے پی آئی اے نے اپنی خدمات پیش کردیں۔
سی ای او پی آئی اے ایئرمارشل ارشد ملک نے اے آر وائی نیوز سے گفتگو کرتے ہوئے کہا یوکرین میں پھنسے طلبا کو لانے کیلئے خصوصی پرواز چلانے کو تیار ہیں۔
ایئرمارشل ارشد ملک کا کہنا تھا کہ طلبا کو وطن پہنچانے کیلئے وزارت خارجہ سےرابطےمیں ہیں، جیسے ہی گرین سگنل ملے گا ، طلبا کو پاکستان پہنچادیں گے۔
سی ای او پی آئی اے نے کہا کہ پی آئی اے ہمیشہ مشکل گھڑی میں اپنے ہم وطنوں کے شانہ بشانہ ہے۔
انھوں نے بتایا کہ یوکرین میں موجود پاکستانی سفیرجنرل(ر) نول سے ٹیلیفونک رابطہ ہوا ہے،سفیر جنرل نول (Noel)نے کہا ہے کہ ہم معلومات اکھٹا کررہے ہیں ،جیسے ہی صورتحال بہتر ہوگی ہم آپ کو آگاہ کردیں گے۔
