کراچی : وزیراعظم عمران خان نے کہا ہے کہ قومی ایئر لائن پی آئی اے کو منافع بخش ادارہ بنا کر اپنے پاؤں پر کھڑا کرنا چاہتے ہیں، یہ ادارہ پاکستان کی پہچان ہے۔
ان خیالات کا اظہار انہوں نے پی آئی اے میں اصلاحات کے حوالے سے اجلاس سے خطاب کرتے ہوئے کیا، وزیر اعظم کی زیرصدارت اجلاس میں پی آئی اے کے انتظامی، مالی اور دیگر معاملات سے متعلق بریفنگ دی گئی،اس موقع پر پی آئی اے کی بہتری کے لئے کی جانے والی کوششوں سے بھی آگاہ کیا گیا۔
اجلاس سے خطاب میں وزیر اعظم کا کہنا تھا کہ قومی ایئرلائن ہونے کے ناطے پی آئی اے ملک کی پہچان ہے، بدقسمتی سے ماضی میں پی آئی اے بدانتظامی اور کرپشن کا شکار رہا، ان اداروں کا بوجھ عام آدمی اور ٹیکس دہندگان کو برداشت کرنا پڑ رہا ہے۔
وزیراعظم کا مزید کہنا تھا کہ پی آئی اے کو منافع بخش ادارہ بنانے کیلئے حکومت ہر ممکن تعاون کرے گی، پی آئی اے کو منافع بخش ادارہ بنا کر اپنے پاؤں پر کھڑا کرنا چاہتے ہیں، ادارے کے خسارے پر قابو پانے کیلئے جامع بزنس پلان بنایا جائے۔
وزیراعظم نے چیئرمین پی آئی اے کو جامع بزنس پلان کو حتمی شکل دینے کی ہدایت بھی کی۔ وزیراعظم کو بریفنگ میں بتایا گیا کہ ادارے کا کل خسارہ 414.3ارب روپے ہے،194جعلی ملازمین73کیبن کریو اور سات پائلٹس کو جعلی ڈگری ہونے پر فارغ کیا گیا، اس موقع پر وزیراعظم عمران خان کی جانب سے موجودہ انتظامیہ کی کوششوں پر اطمینان کا اظہار کیا۔
