کراچی: قومی ایئرلائن میں اصلاحات کے ثمرات سامنے آنے لگے، ٹیکنیکل عملے نے ٹگ ماسٹر کی ازخود مرمت کرکے قوم کے کروڑوں روپے بچا لیے۔
تفصیلات کے مطابق قومی ائیرلائن کی ٹیکنیکل گراؤنڈ سروس کے عملے نے اپنی ناکارہ قرار دی جانے والی گاڑیوں کو قابل استعمال بنانے کے عمل میں ٹگ ماسٹر کو دوبارہ سے قابل استعمال بنا دیا ہے۔
ابتدائی طور پر جب ان ٹگ ماسٹر کی مرمت کے لیے تخمینہ لگایا گیا تھا تو ایک ٹگ ماسٹر کی مرمت پر سوا کروڑ روپے کا خرچہ آرہا تھا لیکن گراؤنڈ سروس کے تکنیکی عملے نے اسے چھ لاکھ روپے میں قابلِ استعمال بنادیا ہے۔
پی آئی اے کی ٹیکنیکل گراؤنڈ سروس کا اسٹاف مزید دو ٹگ ماسٹرز کی مرمت میں مشغول ہے جس سے پی آئی اے کو واضح طور پر کروڑوں روپے کی بچت ہوگی۔
پی آئی اے کے ترجمان کا کہنا ہے کہ ٹی جی ایس کے ماہر عملے نے مکمل طور پر اپنے وسائل اور ہنر مندی کو استعمال کر کے ٹگ ماسٹر کو دوبارہ قابل استعمال بنا دیا ہے، جو کہ ان کی تکنیکی مہارت کا منہ بولتا ثبوت ہے۔
اس اہم موقع پر پی آئی اے کے صدر اور چیف ایگزیکٹو آفیسر ایئر مارشل ارشد ملک نے ٹی جی ایس ٹیم کو اس اہم کامیابی کو سراہتے ہوئے ٹیم کے اراکین میں تعریفی اسنادبھی تقسیم کئے۔
0
20
