پاکستان فیڈرل یونین آف جرنلٹس (پی ایف یو جے) نے ایف آئی اے کی جانب سے پیکا ایکٹ کی سیکشن20کے چیلنج کرنے پر سخت تشویش کا اظہار کیا ہے۔
جاری کردہ ایک بیان میں پی ایف یوجے کے عہدیداران کا کہنا ہے کہ پیکا ایکٹ کے سیکشن20کواسلام آباد ہائی کورٹ نے کالعدم قراردیا تھا۔
پی ایف یوجے کے صدر اور سیکریٹری جنرل نے پٹیشن کو فوری طور پر واپس لینے کا مطالبہ کیا۔ انہوں نے حکومت کے اسلام آباد ہائی کورٹ کے فیصلے کا احترام کرنے کی یقین دہانی پرعمل کا بھی مطالبہ کیا۔
پی ایف یوجے عہدیداران کا کہنا ہے کہ ن لیگ کی رہنما مریم اورنگزیب نے ہائی کورٹ کے فیصلے کے احترام کی یقین دہانی کراتے ہوئے ایکٹ پر نظرثانی کی یقین دہانی بھی کرائی تھی۔
عہدیداران کا کہنا ہے کہ اب موجودہ حکومت اپنے وعدے سے پھرگئی ہے، ایف آئی اے گزشتہ دور میں پیکا قانون کا غلط استعمال کرتی رہی۔
انہوں نے مزید کہا کہ ایف آئی اے نے سیکشن 20غیرآئینی قرار دینے کو چیلنج کرنے کا فیصلہ کیا، ایک حکومتی ادارہ ن لیگ کی مرضی کے بغیر کس طرح اسے چیلنج کرسکتا ہے۔
