ماسکو: روس میں دوران پرواز کارگو طیارے کے انجن میں آگ بھڑک اٹھی جس کی ویڈیو سوشل میڈیا پر وائرل ہوگئی۔
غیرملکی خبررساں ادارے کی رپورٹ کے مطابق روس میں دوران پرواز کارگو طیارے کے انجن میں آگ بھڑک اٹھی، پائلٹ نے شعلوں میں لپٹے طیارے کو بیکال ایئرپورٹ پر واپس باحفاظت اتار لیا۔
طیارے میں عملے کے پانچ افراد سوار تھے جو چین جارہا تھا، خوش قسمتی سے کوئی جانی نقصان نہیں ہوا۔
ویڈیو میں طیارے کے انجن میں لگی آگ واضح طور پر دیکھی جاسکتی ہے۔
عینی شاہد لیوبوف پچیوفا نے کہا کہ ’میں نے فضا میں ایک زوردار دھماکے کی آواز سنی، پہلے سوچا کہ یہ آتش بازی ہے لیکن آواز بہت عجیب تھی، یہ بہت خوفناک تھا۔‘
رپورٹ کے مطابق کارگو طیارہ چین اور روس کے درمیان سامان لے جانے کے لیے استعمال کیا جاتا ہے۔
طیارہ نے بیکال ہوائی اڈے سے چینی شہر ژانگ ژو کے لیے اڑان بھری تھی جب دھماکے سے اس کے بائیں انجن میں آگ لگ گئی۔
بوریاٹیا ریجن کے سربراہ الیکسی تسیڈینوف نے کہا کہ پائلٹ نے طیارے کے ایک انجن کا استعمال کرتے ہوئے ہنگامی لینڈنگ کی۔
انہوں نے بتایا کہ طیارہ آج مقامی وقت کے مطابق ساڑھے آٹھ بجے ہنگامی لینڈنگ کی۔
ایسٹ سائبیرن ٹرانسپورٹ پراسیکیوٹر آفس کی جانب سے واقعے کی تحقیقات جاری ہیں۔
