ابو ظہبی: متحدہ عرب امارات کے شہر شارجہ میں نشہ آور پودے پکڑے گئے ہیں جنہیں وہیں رہائشی افراد کاروبار کے لیے اگا رہے تھے۔
اردو نیوز کے مطابق متحدہ عرب امارات میں پبلک پراسیکیوشن شارجہ کی ایک رہائشی عمارت میں نشہ آور پودے اگانے کے واقعے کی تحقیقات کر رہی ہے۔
ایک رہائشی عمارت کے انچارج نے پبلک پراسیکیوشن کو رپورٹ کی تھی کہ اسے عمارت کے ایئر کنڈیشن سسٹم کی دیکھ بھال کے دوران نشہ آور پودے نظر آئے ہیں، پولیس کو اس کی رپورٹ کی گئی ہے۔
پبلک پراسیکیوشن نے اطلاع ملتے ہی پولیس کے ہمراہ رہائشی عمارت کا معائنہ کیا تو پتہ چلا کہ متعلقہ فلیٹ میں نشہ آور پودے ایک شیلٹر کے اندر لگائے گئے ہیں۔
رہائشی عمارت سے نشہ آور اشیا کے استعمال میں کام آنے والے آلات بھی برآمد ہوئے، پوچھ گچھ پر پتہ چلا کہ دو ایشیائی افراد نے کاروبار کے لیے نشہ آور پودے اگائے ہوئے تھے۔
پبلک پراسیکیوشن کا کہنا ہے کہ نشہ آور پودوں کی کاشت قابل سزا جرم ہے، اس پر موت تک کی سزا دی جاسکتی ہے۔
