ایڈنبرا: اسکاٹ لینڈ میں ایک ماہر نباتات نے چھوٹی جگہ پر کم وقت میں لاکھوں درخت اگانے کی تکنیک دریافت کر لی۔

تفصیلات کے مطابق اسکاٹ لینڈ میں فصلوں کے تحقیقی مرکز میں کیے گئے ایک تجربے میں یہ بات سامنے آئی ہے کہ بند جگہ یا چھت کے نیچے عمودی فارم میں لگائے گئے پودے کھلے آسمان تلے اگائے گئے پودوں سے 6 گنا تیزی سے بڑھتے ہیں۔

اسکاٹ لینڈ کے عوامی جنگلات کا انتظام سنبھالنے والے ماہر کینی ہی نے اس سلسلے میں بتایا کہ انھوں نے چوڑے پتوں کے پودے لگائے اور 3 ماہ بعد وہ 40 سے 50 سینٹی میٹر لمبے ہو گئے جب کہ کھلے آسمان تلے اگائے گئے ایسے ہی پودے اتنی ہی لمبائی 18 مہینوں میں حاصل کرتے ہیں۔

منیجر کینی ہی کے مطابق موسمیاتی تبدیلیوں کو کم کرنے کے لیے بہت کچھ کرنے کی فوری ضرورت ہے، اور اس کا مطلب یہ ہے کہ درخت اگانے کا عمل بہتر کا جائے، اور اعلیٰ معیار کے درختوں کے بیجوں کی فراہمی یقینی ہو۔

انھوں نے کہا کہ ان کی دریافت کردہ تکنیک پر عمل کر کے بہت چھوٹے سے رقبے میں لاکھوں درخت اگائے جا سکتے ہیں۔

واضح رہے کہ لکڑی اور حیاتیاتی تنوع کے فوائد کے لیے زیادہ سے زیادہ درخت لگانا آب و ہوا اور حیاتیاتی تنوع کے مشترکہ بحران سے نمٹنے کے لیے بہت ضروری ہے۔