کوئٹہ: صوبائی دارالحکومت کوئٹہ میں پلاسٹک کے شاپنگ بیگز کی خرید و فروخت پر جمعرات سے مکمل طور پر پابندی عائد کردی گئی، بایو ڈی گریڈایبل بیگز مارکیٹ میں مہیا کردیے گئے۔
تفصیلات کے مطابق شہری انتظامیہ نے کوئٹہ میں پلاسٹک کے شاپنگ بیگز کی خرید و فروخت پر مکمل پابندی عائد کر تے ہوئے مختلف علاقوں میں پلاسٹک کے 12 گودام سیل کردیے ہیں۔
ایڈمنسٹریٹر میٹرو پولیٹن میر فاروق لانگو کے مطابق شہر کے مختلف علاقوں میں پلاسٹک کے 12 گودام سیل کردئیے گئے ہیں، پلاسٹک بیگ کی خرید و فروخت کرنے والوں کو دو ماہ کا وقت دیا گیا تھا جس کی مدت ختم ہوگئی۔
پلاسٹک پر پابندی عائد کرنے والا ایشیا کا پہلا ضلع
خیبرپختونخوا میں پلاسٹک شاپنگ بیگ پر پابندی عائد
ایڈمنسٹریٹر کوئٹہ کے مطابق شہر میں ماحول دوست بائیو ڈی گریڈیبل شاپرز متعارف کرائے جارہے ہیں ،نجی شعبے میں بائیو ڈی گریڈیبل مینوفیچرنگ پلانٹ نے کام بھی شروع کردیا ہے۔
فاروق لانگو کے مطابق بائیو ڈی گریڈیبل شاپنگ بیگز کے سوا دوسرے شاپرز کے استعمال کی ہر گز اجازت نہیں دی جائے گی اور پلاسٹک شاپنگ بیگ فروخت کرنے والوں کے خلاف سخت کارروائی کی جائےگی۔
ایڈمنسٹریٹر فاروق لانگو کا کہنا تھا کہ تاجر بائیوڈی گری ڈیبل شاپروں کے علاوہ دوسرے پلاسٹک نہ خریدیں، بائیو ڈی گریڈیبل شاپرز ماحول دوست ہیں جو کچھ عرصے بعد خود بخود ختم ہوجاتا ہے۔
یاد رہے کہ اس سے قبل گلگت بلتستان کی وادی ہنزہ میں پلاسٹک کے استعمال پر مکمل طور پر پابندی عائد کردی گئی تھی جس کے بعد ہنزہ پلاسٹک کو ممنوع قرار دینے والا ایشیا کا پہلا ضلع بن گیا ہے۔
ہنزہ میں دکانداروں اور پلاسٹک بیگ کا کام کرنے والے افراد کو متنبہ کیا گیا تھا کہ وہ پلاسٹک بیگ کا پہلے سے موجود اسٹاک 20 اپریل تک ختم کردیں، اس تاریخ کے بعد بیگ کو بنانا، فروخت کرنا، خریدنا اور اس کا استعمال جرم سمجھا جائے گا۔
وزیر اعظم کے مشیر برائے ماحولیات ملک امین اسلم کا کہنا ہے کہ ہنزہ میں پلاسٹک پر پابندی تعزیرات پاکستان دفعہ 144 کے تحت لگائی گئی ہے۔
