پشاور : خیبر پختونخوا کی ضلعی انتظامیہ نے پلاسٹک کے پولیتھین بیگز میں سوئی گیس بھر کر فروخت کرنے والے 16 دکاندار گرفتار کرلئے۔
تفصیلات کے مطابق پشاور کی ضلعی انتظامیہ نے شہر کے مختلف علاقوں میں عوام کیلئے موت کا سامان فروخت کرنے والوں کے خلاف کامیاب کارروائی کی ہے۔
اس حوالے سے ذرائع کا کہنا ہے کہ پشاور میں متعدد دکاندار پلاسٹک بیگز میں غیرقانونی طور پر وال اور نوزل لگا کر سوئی گیس بھرنے کے لیے فروخت کر رہے تھے جس پر انتطامیہ حرکت میں آگئی۔
انتظامیہ نے کارروائی کے دوران پلاسٹک کی تھیلیوں کو سوئی گیس بھرنے کے لیے فروخت کرنے پر 16 دکاندار گرفتار کرلئے اوراشرف روڈ پر ایک گودام سیل کردیا۔
اس حوالے سے ڈپٹی کمشنر پشاور شفیع اللہ خان نے اے آر وائی نیوز کو بتایا کہ سوئی گیس کیلئے پلاسٹک کی تھیلیوںکو اس طرح استعمال کرنا انتہائی خطرناک عمل ہے۔
انہوں نے انتظامی افسران کو اس طرح کے غیر قانونی پلاسٹک بیگز فروخت کرنے والوں کے خلاف سخت کارروائی کی ہدایت کرتے ہوئے حکم دیا کہ کسی بھی دکان میں ایسے پلاسٹک بیگز کی موجودگی پر قانونی کارروائی کی جائے۔
