استنبول: وزیر اعظم شاہد خاقان عباسی آج ترک شہر استنبول میں ڈی 8 اجلاس میں شرکت کریں گے۔
اقتصادی تعاون کے لیے قائم ڈی 8 کے نویں سالانہ اجلاس میں ترکی، انڈونیشیا، ملائشیا، ایران، نائجیریا، آذربائجان، بنگلہ دیش اور گنی شرکت کر رہا ہے۔
وزیر اعظم ڈی 8 کے نویں اجلاس کے موقع پر تنظیم کی صدارت ترکی کے حوالے کریں گے۔ اس موقع پر وزیر خارجہ خواجہ آصف بھی وزیر اعظم کے ہمراہ ہوں گے۔
اجلاس میں ڈی 8 تنظیم کے سیکریٹری جنرل سمٹ رپورٹ پیش کریں گے۔ ڈی ایٹ سمٹ کے موقع پر شاہد خاقان عباسی ترکی کی قیادت اور دیگر عالمی رہنماؤں سے ملاقاتیں بھی کریں گے۔
خیال رہے کہ سنہ 2012 میں اسلام آباد میں ہونے والی ڈی 8 کانفرنس میں پاکستان کو سربراہ چنا گیا تھا، اس وقت صدارتی نشست پاکستان کے پاس ہے تاہم آج یہ ترکی کے حوالے کردی جائے گی۔
ڈی 8 مسلم دنیا کی ابھرتی ہوئی 8 معاشی طاقتوں پر مشتمل ایک تنظیم ہے جس کا قیام سنہ 1997 میں عمل میں آیا۔ تنظیم کا مقصد رکن ممالک کے درمیان معاشی اور تجارتی تعاون کو فروغ دینا ہے۔
اس میں بنگلہ دیش، ترکی، مصر، انڈونیشیا، پاکستان، نائجیریا، ایران اور ملائیشیا بطور رکن ممالک شامل ہیں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
