اسلام آباد : وزیراعظم شاہد خاقان عباسی آج ایک روزہ دورے پرگلگت پہنچیں گے جہاں وہ مختلف ترقیاتی منصوبوں کا افتتاح کریں گے۔
تفصیلات کے مطابق وزیراعظم پاکستان آج گلگت کے چنار گارڈن میں یادگار شہدا پرحاضری دیں گے جہاں وہ یاد گار پرپھول چڑھائیں گے اور گلگت بلتستان کی آزادی کی جنگ کے شہداء کے لیے فاتحہ پڑھیں گے۔
وزیراعظم گلگت نلترایکسپریس وے شاہراہ اور گلگت بلتستان سیکرٹریٹ منصونے کا سنگ بنیاد رکھیں گے اور گلگت بلتستان قانون ساز اسمبلی کی نئی تعمیرکی گئی عمارت کا بھی افتتاح کریں گے۔
بعدازاں شاہد خاقان عباسی گلگت بلتستان قانون ساز اسمبلی اور گلگت بلتستان کونسل کے مشترکہ اجلاسے سے خطاب کریں گے۔
پانچ سال میں وہ ترقیاتی کام ہوئے جو 65 سال میں نہیں ہوئے، وزیراعظم
خیال رہے کہ گزشتہ روز وزیراعظم شاہد خاقان عباسی کا کہنا تھا کہ گزشتہ پانچ سال میں وہ ترقیاتی کام ہوئے جو 65 سال میں نہیں ہوئے۔
شاہد خاقان عباسی کا کہنا تھا کہ حالیہ حکو مت کے دور میں 10 ہزار 400 میگا واٹ بجلی پیدا ہوئی، ملک بھر میں اربوں روپے کے منصوبے شروع کیے گئے اور موجودہ حکومت نے منصوبے مکمل کرکے بھی دکھائے۔
وزیراعظم کا کہنا تھا کہ ہم نے صرف عوام کے لیے کام کیا جس کو دنیا بھی تسلیم کرتی ہے، نہ صرف آج بلکہ کل کے پاکستان کے لیے بھی کام کیا، دنیا ہمارے کام کی معترف ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
