سیاسی غیر یقینی کی موجودہ فضا میں وزیراعظم شہباز شریف اور سابق صدر آصف علی زرداری میں لاہور میں اہم ملاقات ہوئی ہے۔
اے آر وائی نیوز کے مطابق موجودہ سیاسی غیر یقینی کی صورتحال میں وزیراعظم شہباز شریف نے اپنے دورہ لاہور کے دوران سابق صدر آصف علی زرداری سے اہم ملاقات کی ہے جس میں مختلف اہم امور پر تبادلہ خیال کیا گیا ہے۔
ذرائع نے اس ملاقات کے حوالے سے اے آر وائی نیوز کو بتایا ہے کہ وزیراعظم شہباز شریف اور سابق صدر آصف علی زرداری کے درمیان ملاقات کے موع پر وزیر خزانہ مفتاح اسماعیل اور وزیر قانون اعظم نذیر تارڑ میں ملکی سیاسی صورتحال پر گفتگو کی گئی ہے۔
ذرائع نے بتایا کہ ملاقات کے دوران پی ٹی آئی کے اگلے لائحہ عمل اسلام آباد لانگ مارچ کے حوالے سے بھی گفتگو کی گئی اور انتخابی اصلاحات سمیت دیگر امور پر بھی تبادلہ خیال کیا گیا۔
ذرائع کے مطابق ملک کے دو سیاسی بڑوں کی ملاقات میں انتخابی اصلاحات کے ساتھ معاشی استحکام کے لیے تجاویز پر بھی مشاورت کی گئی اور باہمی تعاون سے معیشت کو درپیش مسائل سے نکالنے کے لیے اقدامات کرنے پر اتفاق کیا گیا۔
واضح رہے کہ منحرف ارکان اور میگا کیسز کے حوالے سے عدالتی فیصلوں کے بعد ن لیگ نے حکومت چھوڑنے کے لیے اتحادیوں سے ایک بار پھر مشاورت کا آغاز کردیا ہے۔
مزید پڑھیں: مسلم لیگ ن کی حکومت چھوڑنے کے لئے اتحادیوں سے پھر مشاورت
اس حوالے سے ذرائع کا کہنا ہے کہ گزشہ دو روز میں وزیراعظم آفس میں حکومتی اتحادیوں کی طویل میٹنگز ہوئی ہیں، جس میں اتحادیوں کی اکثریت نے حکومت سے نکلنے کی مشروط حمایت کی ہے۔
