اسلام آباد : وزیراعظم عمران خان نے شہروں میں بڑھتی اسموگ اور آلودگی کا نوٹس لیتے ہوئے بڑے شہر اسموگ کے نقصان سے بچانے کی پالیسی بنانے کی منظوری دے دی۔
تفصیلات کے مطابق وزیراعظم عمران خان کی زیرصدارت آلودگی کے خاتمے سے متعلق اجلاس ہوا ، اجلاس میں ملک امین اسلم ، وزیراعلی پنجاب اور فواد چوہدری ، پنجاب اور خیبر پختونخوا کے چیف سیکریٹریز اورچیئرمین سی ڈی اے شریک ہوئے۔
اجلاس میں آئندہ دنوں میں اسموگ کے امکانات اور نقصانات پر بریفنگ دیتے ہوئے کہا پنجاب اور خیبر پختونخوا کے بڑے شہر دسمبر میں اسموگ کی زد میں ہوں گے، اسلام آباد،راولپنڈی اورسرگودھاسمیت درجنوں دیگرشہراسموگ سےمتاثر ہوں گے۔
وزیراعظم نے کہا کہ آئندہ ہفتے بڑے شہروں کیلیے کلین ائیر پالیسی مرتب کی جائے، لاہور، پشاور،ملتان، فیصل آباد، گوجرانوالہ، سیالکوٹ کے لیے پالیسی بنائی جائے۔
عمران خان نے ہدایت کی کہ شہروں کی ضروریات کے تحت ائیر پالیسی بنائی جائے، وسیع پیمانےپرشجرکاری سےشہروں کو سرسبز بنانے پر توجہ مرکوز کررہے ہیں۔
ان کا کہنا تھا کہ ہمارے منشور کے مطابق آلودگی سے پاک پاکستان ہماری اولین ترجیح ہے، موسمیاتی تبدیلی کےمسائل سے نمٹنے کے طویل مدتی اقدامات کرنے چاہییں۔
وزیراعظم نے مزید کہا کہ آلودگی سے بچنے کے لیے پائیدار ماحولیاتی تحفظ کا منصوبہ ضروری ہے، متعلقہ ادارے آلودگی سے نمٹنے کے لیے صوبائی محکموں کےساتھ مل کرحکمت عملی بنائیں۔
