The news is by your side.

Advertisement

تاجر برادری سے کہتا ہوں ہمارے پارٹنر بنیں مشکلات ختم کریں گے، وزیراعظم

اسلام آباد: وزیراعظم عمران خان کا کہنا ہے کہ تاجر برادری سے کہتا ہوں ہمارے پارٹنر بنیں مشکلات ختم کریں گے، تاجر برادری کو ہماری مدد کرنی ہے۔

تفصیلات کے مطابق اسلام آباد میں وزیراعظم عمران خان سے تقریب سے خطاب کرتے ہوئے کہا کہ معاشی ٹیم اور تاجروں کے درمیان معاہدہ خوش آئند ہے، معاشی ٹیم کی کارکردگی باعث مسرت ہے۔

وزیراعظم نے کہا کہ ترقی یافتہ قوموں کے حکمران عوام کے ٹیکس کی ایک ایک پائی کا حساب دیتے ہیں، وزیراعظم بننے کے بعد پی ایم آفس اورہاؤس کے اخراجات میں نمایاں کمی کی، میرا کوئی کیمپ آفس نہیں، کوئی کاروبار شروع نہیں کیا۔

انہوں نے کہا کہ بیرون ملک دوروں میں اخراجات گزشتہ سربراہان کی نسبت 10 گنا کم کیے، ہمیں عوام کے پیسے کی قدر ہے،عوام کا پیسہ عوام کے لیے ہے، جب تک ٹیکس ادائیگی مناسب انداز میں نہیں ہوگی ملک ترقی نہیں کرسکتا۔

وزیراعظم عمران خان نے کہا کہ قوم مقابلہ کرے تو مشکل سے مشکل وقت سے نکل سکتے ہیں، تنہا حکومت کچھ نہیں کرسکتی قوم کو بھی مدد کرنا ہوتی ہے، خوددار قوم کی دنیاعزت کرتی ہے، تاجروں سے درخواست کرتا ہوں ٹیکس جمع کرائیں۔

انہوں نے مزید کہا کہ تاجربرادری کو ہماری مدد کرنی ہے، تاجربرادری سے کہتا ہوں ہمارے پارٹنر بنیں مشکلات ختم کریں گے، مہنگائی کا احساس ہے، کنٹرول کرنے کے لیے ہرممکن اقدام کر رہے ہیں۔

fb-share-icon0
Tweet 20

Comments

comments

یہ بھی پڑھیں