خیبر: وزیر اعظم عمران خان خیبر ایجنسی کی وادی تیراہ پہنچ گئے جہاں انہوں نے اسپورٹس گالا میں بطور مہمان خصوصی شرکت کی۔
تفصیلات کے مطابق وزیر اعظم عمران خان خیبر ایجنسی کی وادی تیراہ پہنچے جہاں انہوں نے اسپورٹس گالا میں بطور مہمان خصوصی شرکت کی۔ اس موقع پر خیبر پختونخواہ کے گورنر اور وزیر اعلیٰ بھی تقریب میں شریک تھے۔
وزیر اعظم کی آمد کے موقع پر فرنٹیئر کور کے دستے نے انہیں سلامی دی۔ باغ امن میلے میں پرجوش نوجوانوں نے روایتی رقص بھی کیا۔
وزیر اعظم نے بہترین کارکردگی کا مظاہرہ کرنے والوں میں انعامات بھی تقسیم کیے۔
اس کے بعد وزیر اعظم عمران خان تاریخ ساز منصوبے مہمند ڈیم کا سنگ بنیاد رکھیں گے، سابق چیف جسٹس ثاقب نثار بھی تقریب سے خطاب کریں گے جبکہ تقریب میں وفاقی وزرا، چیئرمین واپڈا اور وزیر اعلیٰ خیبر پختونخواہ بھی شریک ہوں گے۔
مہمند ڈیم ضلع مہمند میں دریائے سوات پر منڈا ہیڈ ورکس سے 5 کلومیٹر اپ سٹریم تعمیر کیا جا رہا ہے، 700 فٹ بلند ڈیم میں 1.293 ملین ایکڑ فٹ پانی ذخیرہ کیا جا سکے گا۔ مہمند ڈیم کی تعمیر نومبر 2024 میں مکمل ہو جائے گی۔
