اسلام آباد: وزیر اعظم عمران خان کی زیر صدارت اجلاس منعقد ہوا جس میں ملک میں کاروبار کے لیے سازگار ماحول پیدا کرنے پر پیشرفت کا جائزہ لیا گیا۔
تفصیلات کے مطابق وزیر اعظم عمران خان نے کاروباری سرگرمیوں سے متعلق اجلاس کی صدارت کی۔ اجلاس میں وفاقی وزیر خزانہ اسد عمر، مشیر تجارت عبدالرزاق داؤد اور اقتصادی ماہرین شریک ہوئے۔
اجلاس میں ملک میں کاروبار کے لیے سازگار ماحول پیدا کرنے پر پیشرفت کا جائزہ لیا گیا۔ اجلاس میں ملک میں کاروبار اور سرمایہ کاری کے لیے سہولتوں کے حوالے سے وزیر اعظم کو بریفنگ دی گئی۔
اجلاس میں غیر ملکی سرمایہ کاروں کے مسائل سے نمٹنے کے لیے اقدامات پر بھی تبادلہ خیال کیا گیا۔
اس سے قبل وزیر اعظم عمران خان نے فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے انتخابات میں یونائیٹڈ بزنس گروپ کی فتح پر مبارکباد دی تھی۔
وزیر اعظم کا کہنا تھا کہ ایف پی سی سی آئی کے نو منتخب صدر اور ساتھیوں کو مبارکباد پیش کرتا ہوں، تاجر اور صنعتکار ملکی معیشت میں کلیدی حیثیت رکھتے ہیں۔
وزیر اعظم کا کہنا تھا کہ اقتصادی ترقی میں فیڈریشن کے کردار کا خیر مقدم کرتے ہیں، ملکی معاشی ڈھانچے میں انقلابی اصلاحات کے عمل کا آغاز کیا جا چکا ہے۔ پرامید ہوں فیڈریشن اقتصادی مسائل کے حل میں دست و بازو بنیں گے۔
