The news is by your side.

Advertisement

وزیر اعظم نے افغانستان میں پھنسے پاکستانیوں کو واپس لانے کی ہدایت کر دی

افغانستان میں پھنسے پاکستانیوں کو رواں ہفتے واپس لایا جائے گا، وطن واپسی پر انھیں 7 دن قرنطینہ میں رکھا جائے گا

اسلام آباد: کرونا وائرس کی وبا کی وجہ سے افغانستان میں پھنسے پاکستانیوں کی وطن واپسی کے معاملے پر وزیر اعظم عمران خان نے ایکشن لے لیا۔

اے آر وائی نیوز کے مطابق چیئرمین سیفران کمیٹی سینیٹر تاج آفریدی نے وزیر اعظم عمران خان کو افغانستان میں پھنسے پاکستانیوں کے سلسلے میں خط لکھا تھا جس پر انھوں نے ایکشن لے کر پاکستانیوں کو وطن واپس لانے کی ہدایت کر دی۔

ذرایع کے مطابق وفاقی حکومت نے افغانستان میں پھنسے پاکستانیوں کو رواں ہفتے واپس لانے کا فیصلہ کیا ہے، وطن واپسی پر ان مسافروں کو 7 دن قرنطینہ میں رکھا جائے گا، وزیر اعظم نے طورخم بارڈر پر قرنطینہ سینٹر کے لیے ضروری اقدامات کی ہدایت بھی کر دی۔

یو اے ای میں رہا کیے گئے پاکستانی قیدیوں کو جلد لائیں گے، معید یوسف

مشیر برائے قومی سلامتی معید یوسف نے اس سلسلے میں سینیٹ کی قائمہ کمیٹی برائے سیفران کے چیئرمین کو فون کر کے مطلع کیا کہ طورخم، چمن بارڈر پر پھنسے پاکستانیوں کو جلد واپس لایا جائے گا۔

سینیٹر تاج آفریدی کا کہنا تھا کہ بارڈر پار پاکستانی مسافروں اور ڈرائیورز کو مشکلات کا سامنا ہے۔ خیال رہے کہ گزشتہ روز تاج آفریدی نے وزیر اعظم کو افغانستان سے پاکستانیوں کی واپسی کے سلسلے میں خط لکھا تھا، چیئرمین سینیٹ صادق سنجرانی نے بھی وزیر اعظم سے بارڈر پر پھنسے پاکستانیوں کی واپسی کی درخواست کی تھی۔

Comments

یہ بھی پڑھیں