اسلام آباد: اتحادیوں نے وزیر اعظم عمران خان کو ڈپٹی چیئرمین سینیٹ کے لیے امیدوار کی نامزدگی کا اختیار دے دیا۔
تفصیلات کے مطابق آج وزیر اعظم نے اتحادی جماعتوں کے رہنماؤں سے ملاقات کی، جس میں وفاقی وزیر زبیدہ جلال، ایم این اے خالد مقبول صدیقی، وفاقی وزرا پرویز خٹک، شفقت محمود، شبلی فراز، اسد عمر اور طارق بشیر چیمہ شریک ہوئے۔
اس ملاقات میں چیئرمین سینیٹ کے انتخاب، ڈپٹی چیئرمین سینیٹ کے لیے امیدوار کی نامزدگی، اور ملکی سیاسی صورت حال پر تبادلہ خیال کیا گیا، حکومتی اتحادی جماعتوں کی جانب سے وزیر اعظم کی قیادت پر بھرپور اعتماد کا اظہار کیا گیا۔
ملاقات میں وزیر اعظم عمران خان نے اتحادی جماعتوں کی قیادت سے مشاورت کی، جی ڈی اے رہنما بعض مصروفیات کی وجہ سے مشاورت میں شریک نہ ہو سکے، جس پر وزیر اعظم نے جی ڈی اے قیادت سے ٹیلی فون پر مشاورت کی۔
اتحادی قیادت نے ایوان بالا میں چیئرمین، ڈپٹی چیئرمین سے متعلق وزیر اعظم کے فیصلے کی حمایت کا اعادہ کیا، اور ملک کی بہتری کے لیے وزیر اعظم کے وژن کو عملی جامہ پہنانے کے لیے مکمل حمایت کا یقین دلایا گیا۔
اتحادیوں نے چیئرمین، ڈپٹی چیئرمین سینیٹ کا انتخاب بھرپور انداز سے لڑنے کا فیصلہ کیا، اتحادی قیادت نے کہا وزیر اعظم ڈپٹی چیئرمین کے لیے جسے بھی نامزد کریں گے، وہ فیصلہ ہمیں قبول ہوگا۔
ملاقات کے بعد ایک اتحادی رکن نے اے آر وائی نیوز سے گفتگو کرتے ہوئے بتایا کہ ہم نے وزیر اعظم کو ڈپٹی چیئرمین کی نامزدگی کا اختیار دے دیا ہے۔
